بی ییم بسم الله دان

تاتی تمته چان! 
باشدان باشا هاوام بورکو
هاوام بوزاریر
بوزاریر هاوام
هاوام قان قوخویور
قان قوخویور هاوام
قان یاغاجاق دیر
یاغاجاق دیر قان...

بو منم آتا
نسیم خانیم! 
تالا- تالا تاتا تام تام بولودلارین سلامی نی آلان قیز
قاری بولودلارین ولم یکن له کفوا" احدینه یازیلان قیز
آدیمی یاغمورلاردان سور
یاغمورلارا دئی: 
دنیزه ساری گلسه لرده
آفتابا گوتورمه سینلر
ایشیغیلیغا چیخمادی بولودلاریم
آنالاری مه لر قالدی
باشیما آتلاندیلار
گوجوم چاتمادی اوزومه 
الله دا بوغازیمداکی بولودلاری
داشدان یوموشاق یارادا بیلمه دی
بویوردن گیردیلر 
بوغازیمدا ، بولودلارین باشماق تایی قالدی
اوتقونا بیلمه دیم... 
بو منم آتا
نسیم خانیم! 
ائوره شه یوللارین دوشیزه ی مکرمه سی
ایزسیز یوللارین ، این ره که تو می روی به ترکستانی... 
زردشت کیتابی نین چنین گفت.و
موتلو آینالارین موتو مهمان خاناسی 
داش باشلی دنیانین حجرالاسود داشی
بو منم آتا 
نسیم خانیم! 
یازقی ما یازیلمیش یئسیر مکتوبلاردا
نه باغ منه قالدی، نه ده داغ 
آغاجلیغیم بالتا یئمه میش آغاجا چئوریلمه دی
قویروقلارین قیسیب نم هارایا گئتدیلر
بیر سوفرادا دوز چورک یئیه ن . دوزدانی سیندیران قوشلار
تانری لارا دئی: 
آغاجلار یالیقیزلیغا یارانماییب
قوش لار قانادسیزلیغا
اورمو گولو سوسوزلوغا
خان چوبان ساراسیزلیغا
بو منم آتا 
نسیم خانیم! 
گوموش آتلازلارین عبدالباسطی سی
ساری بنووشه لر مقللیدی
حئییض دن عمله گلن قیزیل گوللرین ننه لییی
نرگیزلرین بوراملی دایه سی
سندن باشقا
هئچ کیمسه بیلمه دی
باشیمدان سئل لر، سولار آشیب
یئسیر بیر قالابالیغا دونموشم
نه کورپو تاپیرام کئچه م
نه سو تاپیرام ایچه م
دیشیمه سالمیشام دویون لری
بارماغینان آچیلماییرلار آتا!
سندن باشقا 
هئچ کیمسه بیلمه دی
ایگیت بارماغلاریمدا کپنک لر قوجالدی
ساری ساچلاریمدا گونه باخانلار
داشیم دوشدو دونیانین باشینا
دونیایا دئی: 
ایگنه سین یئمه میشدیم کی...
بو منم آتا 
نسیم خانیم! 
گل منی میندیرک دره لردن آشان " آغ آتینا"
گل منی اویره دک سونسوز اوفوق لار
گل منی آپاراق نیگار خانیمین "میرکورکورومو" گیله
گل منی گئیدیرک لوپ لوپدان چیخان تانری نین اگنینه
گل لعنت یوللایاق
یاوان،اولدوزسوز گئجه لرین اکیب دوغانینا
ذاتینین سودونه
گل منی قایتاراق گرانادایا
گوی لر بویوگون سوزونو یئره سالمازلار
من دئمه کدن
اوزومون دریسی گئدیب
من دئییب من ائشیتمیشم
گل آتا! 
گل سن دئی اولدوزلارا 
منی یئردن گوتورسون لر